Тарҷумаи ҳол
Назарова Хуморбӣ Давламадовна соли 1998 факултети химияи Донишгоҳи давлатии шаҳри Кӯлобро бо муваффакият бо тахассуси химия хатм намуда, тибқи тақсимоти Вазорати маорифи Тоҷикистон дар факултети химия ва биология, кафедраи химия ба сифати ассистент фаъолият намуд. Аз соли 1999 дар Донишгоҳи давлатии миллии Тоҷикистон (алҳол Донишгоҳи миллии Тоҷикистон) факултети химия, кафедраи химияи физикӣ ва коллоидӣ қаблан коромӯз – тадқиқотӣ, лаборанти калон, баъдан ходими илмӣ фаъолият намуд. Моҳи декабри соли 2006 рисолаи номзадии худро дар мавзӯи «Термодинамика ва комплексҳосилкунии Fe(II)-Fe(III) бо бензимидазол-об» (роҳбарони илмӣ д.и.х., профессор Юсупов З.Н., н.и.х., дотсент Раҷабов У.Р.) дифоъ намуд. Моҳи сентябри соли 2008 дар кафедраи химияи фармасевтӣ ва заҳршиносии ДДТТ ба номи Абӯалӣ ибни Сино ба сифати ассистенти кафедра фаъолият намуд. Аз соли 2010 то ҳол ҳамчун дотсенти кафедраи химияи фармасевтӣ ва заҳршиносӣ фаъолият менамояд. Назарова Х.Д. дар корҳои илмӣ – тадқиқотии кафедра фаъолона иштирок менамояд. Аз натиҷаҳои илмии ба даст омада Назарова Х.Д. то имрӯз зиёда аз 58 маводи чопӣ ба табъ расонидааст, ки бештари онҳо мақолаҳои илмӣ ба шумор меравад. Назарова Х.Д. дар рафти фаъолият дар кафедра ба донишҷӯёни курсҳои 1 ва 2 аз фанҳои химияи ғайриорганикӣ, физикӣ ва коллоидӣ, ва органикӣ дарсҳои лексионӣ ва машғулиятҳои семинарӣ бурдааст. Номбурда куратори донишҷӯёни курси 1-уми факултети фармасевтӣ ба ҳисоб меравад. Ӯ дар рафти кор дар кафедра ба тарҷума ва навиштани коркарду дастурҳои таълимӣ машғул шудааст. Дар натиҷаи кори пурсамари ӯ китобҳои дарсӣ аз химияи ғайриорганикӣ ва фармасевтӣ ба забонҳои тоҷикӣ аз чоп баромад. Инчунин дастурҳои таълимӣ – методӣ (Суръати реаксияи химиявӣ. Реаксияи оксиду барқароршавӣ), Қонуни даврии Д.И. Менделеев ва Сохти атом ба забони тоҷикӣ аз чоп баромада, ҳаммуаллифи 25 воситаҳои таълимӣ ба шумор меравад, ки барои донишҷӯёни курсҳои якум, дуюм, сеюм, чорум ва панҷуми факултети фармасевтӣ ба забонҳои русӣ ва тоҷикӣ ба табъ расидаанд. Назарова Х.Д. узви Шӯрои олимони факултети фармасевтӣ мебошад. Назарова Х.Д. бо ахлоқи ҳамида ва рафтору гуфтору кирдору пиндори нек сазовори боварии ҳайати муаллимони кафедра ва донишҷӯён гашта ба дилу дида маъвои ҷовидонаи хешро баргузидааст.
