Тарҷумаи ҳол
Ман, Саидӣ Дилафрӯз Раббизода, дар Ҷумҳурии Тоҷикистон таваллуд шудаам. Пас аз хатми муассисаи таҳсилоти миёна соли 1991 ба Филиали Хуҷандии Донишгоҳи техникии Тоҷикистон дохил шуда, соли 1996 ихтисоси «Технология ва тарҳрезии маснуоти дӯзандагӣ»-ро бо муваффақият хатм намудам. Фаъолияти меҳнатии худро дар соҳаи таҳсилоти олӣ оғоз намуда, солҳои 2002-2004 ҳамчун ассистенти кафедраи технология ва дизайни маснуоти дӯзандагии Филиали Хуҷандии Донишгоҳи техникии Тоҷикистон фаъолият кардам. Солҳои 2004-2012 вазифаи мудири кафедраи технология ва дизайни маснуоти нассоҷӣ ва дӯзандагиро ба уҳда дошта, дар рушди корҳои таълимӣ, илмӣ ва омодасозии мутахассисони соҳа саҳми назаррас гузоштам. Солҳои 2012-2014 роҳбари Маркази тестӣ ва идоракунии сифати таълими Донишкадаи политехникии Донишгоҳи техникии Тоҷикистон будам. Дар ин давра масъалаҳои аккредитатсия, баҳодиҳии сифати таҳсилот ва ҷорӣ намудани низомҳои муосири назорати сифатро роҳандозӣ намудам. Солҳои 2014-2015 ҳамчун муовини директор оид ба корҳои таълимии Донишкадаи политехникии Донишгоҳи техникии Тоҷикистон фаъолият намуда, дар такмили барномаҳои таълимӣ ва татбиқи сиёсати давлатӣ дар соҳаи маориф саҳм гузоштам. Аз соли 2015 то соли 2023 вазифаи директори Донишкадаи политехникии Донишгоҳи техникии Тоҷикистонро ба уҳда доштам. Дар ин мақом ислоҳоти идоракунии муассиса, баланд бардоштани сифати таҳсилот, густариши ҳамкориҳои байналмилалӣ ва рушди фаъолияти илмӣ-тадқиқотиро роҳбарӣ намудам. Соли 2011 дараҷаи илмии номзади илмҳои техникӣ соҳиб гардидам. Муаллифи зиёда аз 80 асарҳои илмӣ, аз чумла 8 китоби дарсӣ ва 38 шаҳодатномаи моликияти зеҳнӣ мебошам. Аъзои вобастаи Академияи муҳандисии Ҷумҳурии Тоҷикистон ва Академияи байналмилалии муҳандисӣ буда, дар рушди илм, техника ва тайёр намудани кадрҳои баландихтисос фаъолона саҳм мегузорам. Барои баланд бардоштани дониш ва малакаҳои касбӣ дар барномаҳои гуногуни байналмилалӣ дар Иёлоти Муттаҳидаи Амрико, Шветсия, Испания, Италия, Олмон, Полша, Чин ва Федератсияи Россия иштирок намудаам. Соли 2023 барномаи магистрии идоракунии давлатӣ барои хизматчиёни давлатиро дар Академияи хоҷагии халқ ва хизмати давлатии назди Президенти Федератсияи Россия хатм намудам. Аз моҳи марти соли 2025 вакили Маҷлиси намояндагони Маҷлиси Олии Ҷумҳурии Тоҷикистон интихоб гардида, ҳамчун узви Кумитаи энергетика, саноат, сохтмон ва коммуникатсия фаъолият менамоям. Дар таҳия ва такмили қонунгузорӣ, рушди сиёсати давлатӣ ва пешбурди ташаббусҳои иҷтимоию иқтисодӣ саҳм мегузорам. Самтҳои асосии фаъолияти касбии ман сиёсати давлатӣ ва идоракунӣ, роҳбарии муассисаҳои таҳсилоти олӣ, муҳандисӣ, рушди саноат, таъмини сифати таҳсилот ва ҳамкориҳои байналмилалиро дар бар мегиранд. Барои хизматҳои арзанда бо як қатор мукофотҳо ва ифтихорномаҳо сарфароз гардидаам, аз ҷумла Медали тиллоии Федератсияи Россия «Барои фаъолияти инноватсионӣ дар соҳаи маориф» (2021), нишони «Аълочии маорифи Ҷумҳурии Тоҷикистон» (2016), Ифтихорномаи Ҷумҳурии Тоҷикистон ва дигар мукофотҳои соҳавӣ. Оиладор ҳастам.
