Тарҷумаи ҳол
Абдулазизов Раҳимҷон Абдувалиевич 23 январи соли 1985 дар деҳаи Чилгазии шаҳри Исфара, оилаи хизматчӣ таваллуд шудааст. Соли 1991 дар Муассисаи таҳсилоти миёнаи умумии № 1-и ба номи А.С. Пушкини шаҳри Исфара таҳсилро оғоз намуда, баъдан Муассисаи таҳсилоти миёнаи умумии № 55 – ро бо баҳои аъло хатм намудааст. Дар фаъолияти толибилмӣ, фаъолона дар олимпиадаҳои фаннӣ ва мусобиқаҳои варзишӣ - ҳарбӣ иштирок намуда сазовори сипосномаи мудири раёсати маорифи шаҳри Исфара, Комиссариати ҳарбии шаҳри Исфара ва сертификати лагери байналмилалии «Дӯстии халқҳо» дар соли 2000, лагери тобистонаи байналмилалии «Омӯзиши демократия» дар соли 2001 гардидааст. Соли 2002 ба Донишгоҳи давлатии ҳуқуқ, бизнес ва сиёсати Тоҷикистонро аз рӯи ихтисоси «Иқтисодиёт ва идоракунии корхонаҳо» тахассуси иқтисодчӣ дохил гардида соли 2007 бо дипломи аъло хатм намудааст. Дар фаъолияти донишҷӯи сазовори ифтихорномаи ректори донишгоҳ, декани факултет ва раиси шаҳри Исфара гардидааст. Соли 2006 кафедраи ҳарбии назди донишгоҳро хатм намуда дорандаи рутбаи лейтенанти хурд гардидааст. Фаъолияти меҳнатиашро аз моҳи августи соли 2007 ҳамчун ассистенти кафедраи иқтисодиёти корхонаҳо ва соҳибкории факултети бизнес ва ҳисобгирии Донишгоҳи давлатии ҳуқуқ, бизнес ва сиёсати Тоҷикистон оғоз намудааст. Дар давоми фаъолияти корӣ худро ҳамчун корманди болаёқат ва меҳнатдӯст нишон дода, бо муоширати хуб, байни кормандони факултет ва донишгоҳ обрӯ ва эътибор пайдо намудааст. Новобаста ба ҷавониаш аз соли 2007 то соли 2010 дар факултети бизнес ва ҳисобгирӣ вазифаи раисии Созмони ҷавонони факултетро бар дӯш дошт. Аз соли 2010 то соли 2013 дар вазифаи раиси Иттифоқи касабаи факултети номбурда фаъолият бурдааст. Бо назардошти фаъолияти пурмасъулияташ соли 2013 ӯро ба вазифаи муовини декан оид ба корҳои тарбияи факултети бизнес ва идоракунӣ таъин намуданд ва соли 2014 ғолиби мусобиқаи беҳтарин муовини декан дар байни факултетҳои донишгоҳ гардид. Номбурда аз соли 2016 фаъолияти худро ҳамчун сармуаллими кафедраи иқтисодиёти корхонаҳо ва соҳибкорӣ идома дода, моҳи сентябри соли 2018 бомуваффақият рисолаи номзадии худро дар Шурои дифои рисолаҳои илмии Донишгоҳи миллии Тоҷикистон дифоъ намуда, сазовори унвони номзади илмҳои иқтисодӣ гардидааст. Соли 2022 мавзуи рисолаи докториро таҳти унвони «Иқтидори минтақавии рушди бозорӣ дар баландбардории сатҳи устувори бахши агрорӣ» («Региональный потенциал развития садоводства в повышении устойчивости аграрного сектора») тасдиқ намудааст. Дар таҳқиқоти илмиаш оид ба рушди соҳаи боғдорӣ дар минтақаҳои Ҷумҳурии Тоҷикистон пешниҳодҳои мухталиф дода шуда, муаллифи монография, якчанд таълифоти илмӣ ва зиёда аз 50 мақолаҳои илмӣ мебошад. Дар семинарҳо, форумҳо ва конференсияҳои байналмилалӣ (Москва, Красноярск, Новосибирск, Кубань Житомир (Украина) ва ғайра) иштирок намуда, соҳиби сертификат гаштааст. Абдулазизов Раҳимҷон Абдувалиевич дар фаъолияти кории худ бо якчанд сипосномаву ифтихорномаҳои раёсати Донишгоҳи давлатии ҳуқуқ, бизнес ва сиёсати Тоҷикистон, раиси Иттифоқи касабаи кормандони соҳаи маорифи вилоят, Раиси ҳизби халқи демократии Тоҷикистон дар вилояти Суғд ва раиси Кумитаи ҷавонон, варзиш ва саёҳии Тоҷикистон кадршиносӣ гардидааст. Солҳои таҳсил дар аспирантура гирандаи стипендияи Раиси вилояти Суғд буд. Дар соли 2020 барои хизматҳои бисёрсолаи бенуқсон дар соҳаи маориф, саҳми арзанда дар таълиму тарбияи насли наврас, тайёр намудани кадрҳои болаёқат ва иштироки фаъолона дар ҳаёти ҷамъиятӣ бо Ифтихорномаи Вазорати маориф ва илми Ҷумҳурии Тоҷикистон қадрдонӣ шудааст. Инчунин соли 2021 бо нишони Аълочии маориф ва илми Тоҷикистон қадрдонӣ карда шуд. Фаъолияти меҳнатии худро дар соли 2019 ҳамчун муовини декан оид ба корҳои тарбияи факултети молия ва қарз иҷро намуда, тамоми вазифаҳои ба зиммааш гузошташударо сари вақт бо масъулияти баланд иҷро кардааст. Ҳиссаи баланди масъулиятшиносии Абдулазизов Раҳимҷон Абдувалиевич ба назар гирифта, моҳи апрели соли 2024 ба вазифаи декани факултети молия ва андоз таъин намуданд. Моҳи сентябри соли 2024 бахшида ба Истиқлоляити давлатии Тоҷикистон бо Сипосномаи Раиси вилояти Суғд сарфароз гардонида шуд. Аз моҳи сентябри соли 2024 то инҷониб дотсенти кафедраи молия ва қарз ба ҳисоб рафта вазифаи декани факултети молия ва андозро ба ӯҳда дорад. Умуман қайд кардан ҷоиз аст, ки Абдулазизов Раҳимҷон Абдувалиевич омӯзгори хеле софдил ва ботамкин буда, дар байни ҷомеаи меҳнатӣ обрӯю эътибори хоса дорад ва соҳиби 5 фарзанд мебошад.
