Тарҷумаи ҳол
ҲОЛНОМА Холов Холмаҳмад Исроилович 26 марти соли 1990 дар деҳаи Вешаб, ноҳияи Айнии вилояти Суғд, дар оилаи омӯзгор таваллуд шудааст. Соли 2008 мактаби миёнаи №13-и зодгоҳашро бо баҳои аъло хатм намуда, ҳамон сол ба Донишкадаи кӯҳӣ-металлургии Тоҷикистон дохил шудааст. Соли 2013 донишкадаро аз рӯйи ихтисоси «Ғанигардонии канданиҳои фоиданок» хатм карда, соҳиби тахассуси муҳандиси саноати кӯҳӣ гардидааст. Солҳои 2014–2018 дар аспирантураи Институти химияи ба номи В.И. Никитини Академияи миллии илмҳои Тоҷикистон таҳсил намудааст. Рисолаи номзадиро аз рӯйи ихтисоси химияи физикӣ ҳимоя карда, бо қарори КОА Федератсияи Россия №397/нк аз 26 марти соли 2020 соҳиби дараҷаи илмии номзади илмҳои техникӣ гардидааст. Бо мақсади такмили ихтисос ва баланд бардоштани малакаи касбӣ дар курсҳо ва барномаҳои омӯзишии дохилию байналмилалӣ дар Тоҷикистон ва Ҳиндустон иштирок намудааст. Аз 10 то 21 октябри соли 2022 дар шаҳри Калкуттаи Ҳиндустон дар семинари байналмилалии таълимӣ таҳти унвони «Таҷрибаҳои истеҳсолӣ барои муҳандисон ва олимон» (Industrial Experimentation for Engineers and Scientists), ки дар доираи барномаи ҳамкории техникӣ ва иқтисодии Ҳиндустон баргузор гардидааст, иштирок намудааст. Фаъолияти меҳнатии ӯ аз соли 2013 оғоз гардидааст. Солҳои 2013–2014 ассистенти кафедраи «Кори нафту газ»-и Донишкадаи кӯҳӣ-металлургии Тоҷикистон, солҳои 2014–2016 ассистенти кафедраи «Истиҳроҷи конҳои маъданӣ ва ғайримаъданӣ»-и Коллеҷи кӯҳии ба номи С. Юсупов ва солҳои 2016–2018 ассистенти кафедраи «Химия ва технология»-и Коллеҷи техникии ДТТ ба номи М.С. Осимӣ фаъолият намудааст. Солҳои 2018–2020 дар озмоишгоҳи истеҳсолии ҶДММ «Пакрут» (China Nonferrous Gold Limited) кор карда, солҳои 2020–2022 ҳамчун ходими калони илмии озмоишгоҳи маводшиносии Маркази таҳқиқоти инноватсионии АМИТ фаъолият намудааст. Аз соли 2022 то имрӯз дар Донишгоҳи давлатии омӯзгории Тоҷикистон ба номи Садриддин Айнӣ ба фаъолияти омӯзгорӣ машғул аст. Самти фаъолияти илмии Холов Холмаҳмад Исроилович ба таҳқиқи асосҳои физикӣ-химиявии коркарди ашёи минералӣ, ғанигардонӣ ва коркарди маъданҳои тиллодори душворкоркард, усулҳои алтернативии ишқорронии тилло, коркарди маъданҳои фосфордор ва истеҳсоли нуриҳои минералӣ равона шудааст. Дар доираи корҳои илмӣ масъалаҳои кинетика ва механизми равандҳои гидрометаллургӣ, истифодаи реагентҳои алтернативӣ ба сианид ва моделсозии математикии равандҳои технологӣ мавриди омӯзиш қарор гирифтаанд. Ӯ муаллиф ва ҳаммуаллифи зиёда аз 100 корҳои илмӣ ва илмӣ-методӣ буда, натиҷаҳои таҳқиқоташ дар маҷаллаҳои илмии ҷумҳуриявӣ ва байналмилалӣ ва маводи конференсияҳои илмӣ нашр гардидаанд. Ҳамчунин соҳиби патенти Ҷумҳурии Тоҷикистон № TJ 954 (2018) оид ба усули ҷудо кардани тилло аз маъданҳои сурмаву симобдор мебошад. Натиҷаҳои корҳои илмии ӯ дар раванди таълимии муассисаҳои таҳсилоти олӣ ва миёнаи махсус истифода мегарданд. Барои фаъолияти пурсамари илмӣ ва омӯзгорӣ бо ифтихорнома ва сипосномаҳои муассисаҳои дахлдор қадрдонӣ гардидааст. Соли 2025 соҳиби Ҷоиза ва дипломи Академияи миллии илмҳои Тоҷикистон барои олимони ҷавон аз рӯйи самти илмҳои физикаю математика, химия, геология ва техника гардидааст. Фаъолияти илмӣ, омӯзгорӣ ва муҳандисии ӯ ба ҳалли масъалаҳои амалии саноати кӯҳӣ ва химиявӣ, истифодаи самараноки захираҳои минералии ҷумҳурӣ, таҳияи технологияҳои муосири коркарди ашёи маҳаллӣ ва омода намудани мутахассисони соҳа равона гардидааст. Вазъи оилавӣ: оиладор, соҳиби ду фарзанд. Телефон: E-mail: kkolmahmad@gmail.com
