Тарҷумаи ҳол
30 марти соли 1980 дар деҳаи Қалъаихуми ноҳияи Дарвози Вилояти Мухтори Кӯҳистони Бадахшони Ҷумҳурии Тоҷикистон дар оилаи хизматчӣ ба дунё омадааст. Соли 1997 пас аз хатми мактаби миёнаи рақами 40 ба номи Шоҳ Карим-ал-Ҳусайнӣ барои идомаи таҳсил соли 2002 ба факултети таъриху филологияи Донишгоҳи давлатии Хоруғ ба номи М.Назаршоев дохил шуда, онро бо ихтисоси филолог-муаллими забон ва адабиёти тоҷик хатм кардааст. Солҳои 2003-2007 таҳсилашро дар шуъбаи аспирантураи ин донишгоҳ аз рӯйи ихтисоси 10.02.22 – Забонҳои халқҳои мамолики хориҷи Аврупо, Осиё, Африқо, бумиёни Амрико ва Австралиё (забони тоҷикӣ) идома дода, дар баробари таҳсил солҳои 2002-2007 дар кафедраи забони тоҷикии ин донишгоҳ ба сифати ассистент ва солҳои 2007-2011 дар вазифаи муаллими калон фаъолият намудааст. Солҳои 2005-2006 вазифаҳои ҷонишини декани факултети филология оид ба таълим ва тарбияро ба дӯш доштааст. Қодиров Дилшод Сайдаллоевич соли 2007 дар мавзуи «Тавсифи сохторӣ ва грамматикии фразеологияи шеваӣ (дар заминаи маводи гӯйиши дарвозии забони тоҷикӣ)» аз рисолаи номзадӣ ҳимоя менамояд. Солҳои 2007-2011 дар вазифаи мудири кафедраи забони тоҷикии Донишгоҳи давлатии Хоруғ ба номи М.Назаршоев фаъолият намудааст. Соли 2011 ба кафедраи забонҳои филиали Донишгоҳи аграрии Тоҷикистон ба номи Ш.Шоҳтемур дар ноҳияи Данғара гузашта, дар вазифаи дотсент кор кардааст. Солҳои 2011-2012 вазифаи ҷонишини декани факултети забонҳои хориҷӣ оид ба корҳои таълимӣ ва солҳои 2012-2013 вазифаи декани ин факултетро ба зимма доштааст. Бо таъсиси Донишгоҳи давлатии Данғара дар пояи филиали Донишгоҳи аграрии Тоҷикистон ба номи Ш.Шоҳтемур дар ноҳияи Данғара солҳои 2013-2015 дар вазифаи мудири кафедраи забон ва адабиёти тоҷик ва солҳои 2015-2017 дар вазифаи сардори раёсати таълими Донишгоҳи давлатии Данғара кору фаъолият намудааст. Солҳои 2017-2021 вазифаи декани факултети филология ва рӯзноманигории ин донишгоҳ, солҳои 2021-2022 вазифаи сардори раёсати илм ва татбиқоти донишгоҳ ва солҳои 2022-2025 вазифаи сардори раёсати таълими ин донишгоҳро ба дӯш доштанд. Аз моҳи октябри соли 2025 бо фармоиши вазири маориф ва илми Ҷумҳурии Тоҷикистон дар мувофиқа бо Ҳукумати Ҷумҳурии Тоҷикистон вазифаи муовини ректор оид ба илм ва инноватсияи Донишгоҳи давлатии Хоруғ ба номи М. Назаршоевро ба дӯш дорад Мавсуф иштирокчии фаъоли симпозиуми ҷумҳуриявии «Иқтисод ва илми Вилояти Мухтори Кӯҳистони Бадахшон: дирӯз, имрӯз ва фардо» (Пажӯҳишгоҳи улуми инсонии АИ ҶТ, Хоруғ, соли 2005), конференсияи байналмилалӣ бахшида ба 1000-солаи Носири Хусрав таҳти унвони «Носири Хусрав: дирӯз, имрӯз ва фардо» (Институти мутолиоти исмоилии Лондон, Пажуҳишгоҳи улуми инсонии АИ ҶТ, Хоруғ, соли 2005), конференсияи XIII байналмилалии «Забонҳои таҳти таҳдид ва таърих» (Сандуқи забонҳои дар маърази хатар, Ню-Хейвен-Хоруғ, соли 2009), конференсияи байналмилалӣ дар мавзуи «Илм ва таҳсилоти муосир: мушкилот ва дурнамо» (Донишгоҳи давлатии Данғара, соли 2015), конференсияи байналмилалӣ таҳти унвони «Роҳи абрешим ва робитаҳои байнифарҳангии Авруосиё» (Иттиҳодияи тадқиқоти фарҳангии Ҷумҳурии Корея, Донишгоҳи давлатии тиббии Тоҷикистон ба номи Абуалӣ ибни Сино, Душанбе, соли 2018), конференсияи байналмилалӣ дар мавзуи «Масоили мубрами филология ва лингводидактика» (Донишгоҳи славянии Русия-Тоҷикистон, соли 2019, 2020) буда, бо маърузаҳо баромад намудааст, ки муҳтавои ин суханрониҳо ба сурати мақолаҳои алоҳида мунташир шудаанд.
