Тарҷумаи ҳол
Ман Мубирхони Мӯминпур, мутахассиси соҳаи равобити байналмилалӣ, тарҷумон ва муҳаққиқ ҳастам. Донишгоҳи миллии Тоҷикистонро аз рӯи ихтисоси «равобити байнифарҳангӣ, тарҷумон-референти забонҳои ҳиндӣ ва англисӣ» хатм намуда, як давраи таҳсилро дар Институти марказии забони ҳиндии шаҳри Аграи Ҷумҳурии Ҳиндустон гузаронидаам. Фаъолияти меҳнатии худро соли 2017 дар Осорхонаи миллии Тоҷикистон оғоз кардам. Дар ин муассиса ба ҳайси мутахассис, сармутахассис ва муовини сардори шуъбаи экскурсионӣ ва оммавӣ кор карда, дар муаррифии таърих ва фарҳанги Тоҷикистон ба меҳмонони дохиливу хориҷӣ саҳм гузоштам. Дар солҳои фаъолият ба даҳҳо меҳмони сатҳи олии давлатӣ, роҳбарони созмонҳои байналмилалӣ ва намояндагони кишварҳои хориҷӣ бо забонҳои англисӣ, ҳиндӣ ва урду роҳбаладӣ ва тарҷумонӣ намудаам. Аз ҷумла, дар Намоишгоҳи «Таърихи рушди Тоҷикистон», ки соли 2023 дар қароргоҳи Созмони Милали Муттаҳид дар шаҳри Ню-Йорк баргузор гардид, ба ҳайси роҳбалад ва тарҷумон иштирок доштам. Айни замон сардори шуъбаи равобити хориҷии Донишгоҳи давлатии омӯзгории Тоҷикистон ба номи Садриддин Айнӣ ва ҳамзамон ассистенти кафедраи муносибатҳои байналмилалӣ мебошам. Забонҳои тоҷикӣ, русӣ, англисӣ, ҳиндӣ ва урдуро медонам ва ба кишварҳои гуногуни ҷаҳон сафарҳои илмӣ ва корӣ анҷом додаам. Самти асосии фаъолияти илмии ман омӯзиши робитаҳои адабӣ ва фарҳангии Тоҷикистону Ҳиндустон, осори Умари Хайём, эҷодиёти Ҳариванш Рай Баччан, таърихи фарҳанг, осорхонашиносӣ ва муносибатҳои байналмилалӣ мебошад. Доир ба ин мавзуъҳо дар Тоҷикистон, Ҳиндустон ва дигар кишварҳо мақолаҳои илмӣ ва илмӣ-оммавӣ ба нашр расонидаам. Барои фаъолияти илмӣ ва фарҳангӣ сазовори ҷоизаи байналмилалии «Иттиҳоди дебютҳо» гардидаам. Ин ҷоиза аз ҷониби Хазинаи байнидавлатии ҳамкориҳои башардӯстонаи кишварҳои иштирокдори Иттиҳоди Давлатҳои Мустақил ба ман тақдим шудааст. Дар фаъолияти худ кӯшиш менамоям, ки Тоҷикистонро ҳамчун кишвари дорои таърихи куҳан, фарҳанги ғанӣ ва сиёсати сулҳҷӯёна ба ҷомеаи байналмилалӣ муаррифӣ намоям.
