Тарҷумаи ҳол
Ман, Ҳоҷизода Саидмуқбил Қосим, 20 октябри соли 1983 дар ноҳияи Мастчоҳи вилояти Суғди Ҷумҳурии Тоҷикистон таваллуд шудаам. Соли 1991 ба муассисаи таҳсилоти миёнаи умумии №10-и Ҷамоати деҳоти Мастчоҳи ноҳияи Мастчоҳ дохил шуда, соли 2002 онро бомуваффақият хатм намудам. Ҳамон сол ба Донишгоҳи давлатии Хуҷанд ба номи академик Бобоҷон Ғафуров дохил гардида, соли 2007 ихтисоси омӯзгори физикаро бо баҳои хубу аъло соҳиб шудам. Фаъолияти меҳнатии худро соли 2007 оғоз намудам. Солҳои 2007–2009 дар вазифаи лаборанти кафедраи физикаи умумӣ ва ҷисмҳои сахти факултети физика-техникаи Донишгоҳи давлатии Хуҷанд фаъолият кардам. Солҳои 2009–2010 ҳамчун корманди илмии ҳамин кафедра ба корҳои таълимӣ ва таҳқиқотӣ машғул будам. Аз моҳи марти соли 2010 то моҳи апрели соли 2011 дар вазифаи лаборант-дозиметристи озмоишгоҳи ҳифзи муҳити атроф ва назорати шароити меҳнати Маркази илмию истеҳсолии «Технология»-и КД «Востокредмет» (айни замон Корхонаи воҳиди давлатии «Фулузоти нодири Тоҷикистон») фаъолият намудам. Аз моҳи апрели соли 2011 то моҳи ноябри соли 2021 вазифаи муҳандис-геофизики ҳамин корхонаро ба уҳда дошта, асосан дар самтҳои назорати радиатсионӣ, таҳқиқоти геофизикӣ, мониторинги экологӣ ва таъмини амнияти муҳити зист фаъолият бурдам. Ҳамзамон, дар солҳои 2010–2021 ба ҳайси ҳамкори беруна дар кафедраи фанҳои табиӣ-илмии Донишкадаи кӯҳию металлургии Тоҷикистон фаъолият намуда, аз вазифаи ассистент то дотсенти кафедра расидам. Аз моҳи декабри соли 2021 то моҳи феврали соли 2022 вазифаи мудири озмоишгоҳи таҳлили оби Донишкадаи кӯҳию металлургии Тоҷикистонро иҷро намудам. Аз моҳи феврали соли 2022 то имрӯз дар вазифаи мудири кафедраи фанҳои табиӣ-илмии ҳамин муассисаи таҳсилоти олӣ фаъолият дорам. Солҳои 2012–2016 дар аспирантураи назди Агентии амнияти ядроӣ ва радиатсионии Академияи илмҳои Ҷумҳурии Тоҷикистон таҳсил намудам. Дар натиҷаи таҳқиқоти илмӣ соли 2018 рисолаи номзадии худро дар мавзӯи «Физико-химические и технологические основы переработки ураносодержащих руд месторождений Центрального Таджикистана» аз рӯйи ихтисоси 02.00.04 – химияи физикӣ бомуваффақият ҳимоя намуда, соҳиби дараҷаи илмии номзади илмҳои химия гардидам. Соли 2025 рисолаи доктории худро дар Шурои муттаҳидаи диссертатсионии 6D.КОА.042 дар заминаи Институти химияи ба номи В.И. Никитин ва Агентии бехатарии биологӣ, химиявӣ, радиатсионӣ ва ядроии НАНТ дар мавзӯи «Физико-химические основы комплексных технологий очистки шахтных и сточных вод от тяжёлых и радиоактивных металлов» ҳимоя намуда, сазовори дараҷаи илмии доктори илмҳои техникӣ аз рӯйи ихтисоси 05.17.01 – Технологияи моддаҳои ғайриорганикӣ гардидам. Дар давоми солҳои 2010–2025 дар курсҳои такмили ихтисос, тренингҳо, семинарҳо ва конференсияҳои байналмилалӣ дар кишварҳои Қазоқистон, Қирғизистон, Узбекистон, Австрия, Олмон, Чехия, Иёлоти Муттаҳидаи Амрико, Россия, Озарбойҷон ва Ҷумҳурии Мардумии Чин иштирок намудаам. Самти асосии фаъолияти илмиам ба масъалаҳои химияи физикӣ, технологияҳои коркарди маъданҳои урандор, геофизика, ҳифзи муҳити зист, амнияти радиатсионӣ ва технологияҳои муосири тозакунии обҳои шахтавӣ ва партов бахшида шудааст. Натиҷаҳои таҳқиқоти илмиам зиёда аз 70 мақолаи илмӣ, ки дар маҷаллаҳои илмии ҷумҳуриявӣ ва байналмилалии бонуфуз ба нашр расидаанд, инъикос ёфтаанд.
