Тарҷумаи ҳол
Ман Қиёмзода Зарафо Суфиҷон 20-уми феврали соли 1984 дар деҳаи Қизил-Аскари (имрӯза Тусиён)-и ноҳияи Шаҳритуси вилояти Хатлон дар оилаи омӯзгор таваллуд шудаам. Пас аз хатми донишгоҳ соли 2012 ба вазифаи ходими илмии озмоишгоҳи биологияи молекулавӣ ва биотехнология гузаронида шудам. Сентябри соли 2012 ба ҳайси ассистенти кафедраи физиологияи растаниҳои факултети биологияи ДМТ фаъолияти кориро оғоз намудам. Соли 2013 дар донишгоҳи номбурда рисолаи номзадиамро дар мавзӯи «Биохимические особенности антиоксидантных систем толерантных к соли генотипов картофеля in vitro» ҳимоя намуда, ба унвони номзади илмҳои биологӣ мушарраф гардидам. Соли 2016 дар факултети биология ба вазифаи муовини декан оид ба илм ва робитаҳои байналмилалӣ таъин гардида, ҳамзамон иҷрокунандаи вазифаи дотсентии кафедраи физиологияи растаниҳо ва биотехнологияи ДМТ-ро ба уҳда доштам. Соли 2017 котиби илмии Шӯрои диссертатсионии биология барои дарёфти унвони доктор PhD таъин гардидам. Соли 2019 ба вазифаи мудири кафедраи физиологияи растаниҳо ва биотехнологияи ДМТ гузаронида шудам. Соли 2020 бо Қарори Ҳукумати Ҷумҳурии Тоҷикистон муовини раиси Кумитаи ҳифзи муҳити зисти назди Ҳукумати Ҷумҳурии Тоҷикистон таъин гардида, соли 2021 бо Қарори ҲҶТ ба вазифаи муовини якуми раиси Кумитаи ҳифзи муҳит зист гузаронида шудам ва то январи соли 2025 дар ҳамин вазифа фаъолият кардам. Айни замон вакили Маҷлиси намояндагони Маҷлиси Олии Ҷумҳурии Тоҷикистон мебошам. Дар тӯли фаъолияти корӣ таҳти роҳбарии ман 2 рисолаи номзадӣ дар самти илмҳои биология ҳимоя гардидааст. Аз соли 2013 узви Ҳизби Халқии Демократии Тоҷикистон мебошам. Ман муаллифи зиёда 60 маводҳои илмии нашршуда ва 2 –монография, 1- дастури таълимӣ ва 1 ихтироот (патенти илмӣ) мебошам. Иштироки маро дар корҳои сиёсиву ҷамъиятӣ ба назар гирифта, бо ифтихорномаҳо, сипоснома, аълочии Вазорати маориф ва илми Ҷумҳурии Тоҷикистон, медали соҳавии Кумитаи ҳифзи муҳити зисти назди Ҳукумати Ҷумҳурии Тоҷикистон бахшида ба 30-солагии Истиқлолият, медали “Хизмати Шоиста” сарфароз гардониданд.
